حساب کاربری

لطفا از حروف a-z,A-Z,0-9 استفاده نمایید - حداقل 5 کاراکتر

حداقل 8 کاراکتر

شعر از غلام رستمی آهنگر «بیلمز» به استاد ارسلان میرزایی


شعر از غلام رستمی آهنگر
«بیلمز»

به استاد ارسلان میرزایی

 

اوزاق یولدان یورناق گلن ارسلان
آغیر درده دارمان قیلن ارسلان
گاه آغلایان گاهی گیلن ارسلان
اوزاق یولدا ایناق ائللرنیج اولدو
سئرده ویرن سینمز بئللر نیج اولدو

 

ائل قوصصاسی تئز آغارتی باشینگی
آغ توکلرینگ چوخ گرسدیر یاشینگی
ائل یولداشی اونوتما یولداشینگی
چتین یولدا گورسدن اول بیزلره
قرنگی ده داغدان یئندیر دیزلره

 

اوزاق یولونگ یول گورسددی بئلمه
جانسیز الی تانیش ائتدی قلمه
تورکی دیلی رووان ائتدی دیلیمه
بیزه اولدو جانلی عیسی نفسی
سیتار اولدو چالدی دیرریلیگ قسسی

 

چوخ موددتدیر خوشلوگ ائلدن قچمیشدیر
یوردلار قره چالیر ائللر کوچموشدیر
فلک داسی یولاشلاری بیچمیشدیر
کندلرک ونجو یاتاق اولموش بیزلره
دیزدن دوشوب دایانان یوخ دیزلره

 

اوزاق یولدان دردلی سوزلر یاز گئنه
اورگلردن درد و محنت قاز گئنه
نچی قالدی آرامیزدا راز گئنه
چاغیر گئنه موسی دوغا ائلیمیز
تاباتمامیش پئس قدرلاغا ائلیمیز

 

طیفان قوپموش چادرلاری آتمیش بیل
سئل داشمیشدیر یورد داشینا چاتمیش بیل
داها ائلینگ ایگیدلری یاتمیش بیل
آخ کی یامان یئل وطیفان اوغرامیش
هجیرلری پئس بیربیره دوغرامیش

 

آغیر ائلینگ تک آغاجی چورروموش
قره قاجینگ قانلی چایی قورروموش
آنالارینگ یاغ پنیری ارریمیش
کولگه سالان یوخدور ائله ارسلان
نچی بیزه گلدی بئله ارسلان

 

خزان یئلدن غملی چئولدن بیر دانیش
اوزاق یولدان یاتان ائلدن بیر دانیش
سو سوز قالان قوررو گئلدن بیر دانیش
خبر یوخدورتک آغاجدان ارسلان
بولاق جوشمیر قره قاجدان ارسلان

 

شئر ایگیدلر ائنمز داغدان بیرنوولو
تورکو بورکلو واری سیبیللر توولو
دورماز چول ایسسینه باخا ایز قوولو
ائل اوغلانی بیرنو آلماز چینینه
آغلایان یوخ اونونگ قره گونونه

 

اورتولدی ساتیلدی قره گرمه نی
شوم بوقاناق پئس سووردو خرمه نی
بئلی سینیق یالنقوزام گور منی
بهمن ی بول گئنه جرری باشلایا
ائلینگ قورد و قجیرینی داشلایا

 

من کی بیلمزدیم واللا بیلمه دیم
توخ آغلادیم هئچ اوره گدن گیلمه دیم
بیلمم نچی دیرری قالدیم اولمه دیم
ائل بالاسی هئچ یوخودان قاخمادی
سئل آپاران قرداشینا باخمادی

 

 

ائلینگ آتی باتمیش قره چامیرا
چاغیران یوخ های های ائده چاغیرا
سسلر سیندی قیه ووران یوخ بغیرا
قوی چاغیراگ اولنلردن آلاگ جان
دئیک یاتما بیزدن گچمیش سن اویان

 

ائل آدینی اونودامام آتامام
بو دردلردن یارالی یام یاتامام
آخیر اولدم آرزیلاریم چاتامام
یازینگ اولن ائل دردیندن اولمیش دیر
آغساق آغساق اوزاق یولدان گلمیش دیر

 

سینیقم چیخه مم داغلار باشینا
هیجراندان باتمیشام گوزوم یاشینا
ارسلان…..یاز منیم گورروم داشینا
اوزاق یولدان گلمیش غلام یورناقدیر
گوینو سینیق دیزی سینیق آغساقدیر

 

بیلمز«غلام رستمی آهنگر»

حسن میرزایی
ارسال دیدگاه

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

X